"Кудайберген" базарында салык төлөгүсү келбеген сатуучулар жаңжал чыгарып, мушташканы тууралуу маалымат тарады

"Кудайберген" базарында салык төлөгүсү келбеген сатуучулар жаңжал чыгарып, мушташканы тууралуу маалымат тарады. Бишкектеги “Кудайберген” базарынын ээси Эльвира Сурабалдиева бүгүн, 4-июнда интернеттеги социалдык тармактагы баракчасына: "Эки айдан бери карызын төлөбөгөндөрдүн контейнерлерин жапканбыз. Бүгүн эртең менен салык төлөгүсү келбеген жүздөй сатуучу буга нааразылык билдирип, 20 чакты кызматкериме каршы чыгышты",- деп жазып чыкты. Ал нааразы тарап бир кызматкерин сабап салганын да кошумчалаган.

Ал эми Бишкек ШИИББинин басма сөз кызматы бул маалыматты четке кагып, "Кудайберген" базарында мушташ чыккан жок" деп билдирди.

Маалыматтарга караганда, ижара акысын эки айдан бери төлөбөй жаткан соодагерлердин контейнерлери базардын администрациясы тарабынан жабылган. "Буга нааразы болгон соодагерлер менен администрациянын ортосунда келишпестиктер чыккан, бирок мушташ болгон эмес. Кийин милиция жана базардын коопсуздук кызматынын өкүлдөрү чогулгандарды тараткан, азыр кырдаал тынч" деп билдирди Бишкек ШИИББи.

Автор: Мирлан Өмүралиев