Ош шаарында сууга агып кеткен жарандын жансыз денеси табылды

Ош шаарында сууга агып кеткен жарандын жансыз денеси табылды. Бул тууралуу ӨКМнын басма сөз кызматы бүгүн, 4-июнда билдирди.

2014-жылдын 4-июнь күнү саат 07:54 чамасында Ош шаарынын Туран кичи районунун Набережная көчөсүндөгү үйдүн тургуну Абжалов Аскат үйүнүн жанындагы каналдан суу алып жатып каналдагы чоң дөңгөлөктүн астына туруп калган адамдын жансыз денесин көрүп, ошо замат КРнын ӨКМнын Ош шаардык ыкчам бөлүмүнө кабар берген. ӨКМнын Ош шаардык куткаруу кызматынын куткаруучулары саат 08:00дө чакыруу болгон жерге барып, жансыз денени суудан чыгарышып, ИИМдин кызматкерлерине өткөрүп беришкен. Каза болгон жаран дайынсыз жоголуп жаткан Хабибулло Исманов экени белгилүү болду.

Эскерте кетсек, 2014-жылдын 2-июнь күнү саат 09:05те Ош шаарынын Туран кичи районунун Фурманов көчөсүнүн 6-үйүнүн жашоочусу, 1959-жылы туулган Х.Исманов үйүнүн астынан агып өтүүчү Араван каналына агып кеткен деген божомол менен анын туугандары жана ШИИБдин кызматкерлери КРнын ӨКМнын Ош шаардык башкармалыгына кайрылышкан.

Хабибулло Исмановдун туугандары ал 2014-жылдын 27-майынан бери белгисиз экенин билдиришкен. Ошондой эле кол телефону, тамекиси жана баш кийими суунун жээгинен табылгандыгын кабарлашкан болчу.

Автор: Мирлан Өмүралиев
Фото: ӨКМдан алынды