Чоң-Алай районунун аймагында азык-түлүк товарлары, күйүүчү майлар түгөнүү үстүндө турат

Алай районунун Сопу-Коргон айылында эл аралык Ош - Сары-Таш - Эркеч-Там, Ош - Сары-Таш - Кара-Мык унаа жолунун Ахматбек Келдибековдун тарапташтары тарабынан 27-майдан бүгүнкү күнгө чейин тосулуп турушу эл аралык каттамга жана Чоң-Алай районунун жашоочуларына олуттуу көйгөйлөрдү жаратты. Бул тууралуу 4-июнда Чоң-Алай райондук администрациясынан Сапура Мамытова билдирди.

Анын айтымында, унаалар өтпөй калгандыгына байланыштуу азык-түлүк продукциялары, күйүүчү майлар Ош шаарынан келбей калган. Учурда азык-түлүк, күйүүчү майлардын райондун аймагындагы запасы түгөнүү үстүндө. Катуу ооруган адамдар, зарыл иши бар атуулдар өз убагында облустун борборуна жетпей кыйынчылык тартышууда. Натыйжада жол тоскондорго күндөн-күнгө элдин нааразычылыгы курчуп, коомдук абал татаалдашууда.

Ал эми Чоң-Алай районунун жергиликтүү бийликтери, укук коргоо органдары тарабынан райондун аймагында коомдук-саясий абалдын туруктуулугун сактоо, диний экстремизм-терроризмдин алдын алуу жана улуттар аралык мамилени чыңдоо боюнча алдын алуу жана кылмыштуу окуяларды болтурбоо максатында түшүндүрүү иштери жүргүзүлүп жатат.

Автор: Айсана Паизова