Талас облустук ооруканасында кызматкерлеринин иш-аракетин көзөмөлдөө максатында 16 видеокамера орнотулду

Талас облустук биргелешкен ооруканасында медицина кызматкерлеринин иш-аракетин көзөмөлдөө жана коррупциялык иштердин алдын алуу максатында ар бир бөлүмгө оорукананын өздүк бюджетинин эсебинен 16 видеокамера орнотулду. Бул тууралуу бүгүн, 5-июнда жергиликтүү өкүлчүлүктөн билдиришти.

Маалыматка ылайык, аталган оорукананын ичине 16 камера орнотулуп, ага 76 миң сом сарпталган. Учурда видеокөзөмөл ооруканадагы эң зарыл болгон бөлүмдөргө гана орнотулду, жакынкы арада дагы 16 видеокамера алынып, башка бөлүмдөргө да орнотулмакчы.

Орнотулган видеокамералар ооруканадагы коррупциялык иш-аракеттердин алдын алуу, медицина кызматкерлеринин оорулууларды кабыл алууда жасаган мамилелерин көзөмөлдөө максатында коюлган.

Автор: Мальвина Уметбекова