Неймар Дүйнө чемпиондугунда ич кийимди жарнамалагандыгы үчүн айып пул төлөшү мүмкүн

Эл аралык футбол федерациясы (ФИФА) Бразилиянын футболдук курама командасынын чабуулчусу Неймарды ич кийимди жарнамалагандыгы үчүн айыпка жыгышы мүмкүн. Бул тууралуу бүгүн, 27-июнда чет элдик маалымат каражаттары жазып чыгышты.

Маалыматка ылайык, Бразилия-Камерун командаларынын оюну учурунда Коммерциялык текшерүү департаментинин өкүлдөрүнүн көзү Неймардын ич кийимине түшкөн. Оюнчу өнөктөшү менен футболкасын алмаштырып жатканда анын ич кийиминин ычкырындагы ФИФА менен расмий түрдө иштешпеген компаниянын логотиби көрүнүп калган. Дүйнө чемпиондугунун шарты боюнча, турнир учурунда башка компанияларды жарнамалоого тыюу салынат.

Эске салсак, "Евро-2012" чемпиондугунда Даниянын курама командасынын оюнчусу ич кийимди жарнамалаганы үчүн 100 миң евро айып пул төлөгөн.

Автор: Дамира Арстанова
Фото: Интернеттен алынды