Абибилла Кудайбердиев баш болгон кыргыз делегациясы Астанадагы Коргоо министрлер кеңешинин жыйынына катышат

Бүгүн, 4-июлда Астана шаарында Көз карандысыз Мамлекеттер Шериктештигинин Коргоо министрлер кеңешинин кезектеги отурумун өткөрүү пландаштырылууда. Бул тууралуу Коргоо министрлигинин басма сөз кызматы билдирди.

Кеңешменин ишине Абибилла Кудайбердиев башында турган КРнын Коргоо министрлигинин Коргоо мекемесинин аскердик делегациясы да катышат. Күн тартибине ылайык, кеңешмеде шериктеш мамлекеттердин коргоо мекемелеринин көп тараптуу өз ара кызматташтыгынын ар кайсы багыттары боюнча ондон ашык маселелерди кароо мерчемделүүдө.

Атап айтканда, кеңешменин катышуучулары инженердик аскерлердин минаны гуманитардык зыянсыздандыруу боюнча иштерди жүргүзүүдөгү өз ара аракеттерин; аскердик багыттагы спутниктик байланыштар системин колдонуу маселелерин; спорттун аскердик-прикладдык түрлөрүн өнүктүрүү концепциясынын долбоорун; аскер кызматчыларынын (талаа, аба, деңиз) тажрыйбасы боюнча сынактарды (таймаштарды) уюштурууну; жогорку билим берүү уюмдарынын курсанттарынын эл аралык олимпиадаларын уюштурууну жана башка маселелерди талкуулашат.

Аскердик делегациянын жүрүшүндө Кыргыз Республикасынын Коргоо министринин өз коллегалары менен эки тараптуу жолугушуусу пландалууда. Анда аскердик-техникалык кызматташтык жана аймактык коопсуздук маселелери каралат. Мындан сырткары КРнын Коргоо министри Абибилла Кудайбердиев Казакстан Республикасынын Президенти катышкан Куралдуу күчтөрдүн Улуттук университетинин ачылыш салтанатына катышат.

Автор: Айпери Ганыжан кызы