Жылнаама, 7-июль: Мындан 4 жыл мурун Кыргызстандын экс-муфтийи Мураталы ажы Жуманов 37 жашында көз жумган

* Мындан 64 жыл мурун, 1950-жылы Исхак Раззаковдун жетекчиликтеги ишмердүүлүгү жогору бааланып, 1950-жылы Кыргызстан КП БКнын биринчи секретарлыгына көтөрүлүп, республиканын партиялык уюмун жетектей баштаган. Исхак Раззаковдун убагында, 1953-жылы Союздагы эң оор, тоолуу аймактагы Фрунзе-Ош автоунаа жолу курула баштаган. Республикада оор өнөр жайы гана эмес, айыл чарбасында да ири жетишкендиктер болгон. 1956-жылы айыл чарбасындагы ири жетишкендиктер үчүн Кыргыз ССРи биринчи жолу Ленин ордени менен сыйланган. Исхак Раззаков билим берүү тармагынын да өнүгүшүнө өбөлгө түзгөн. Мектептердин саны өскөн, орус тилдүү мектептерде кыргыз тили окутула баштаган. Жетекчинин демилгеси менен 1957-жылдан баштап республикадагы 80 миңге жакын окуучуга бекер ысык тамак берүү уюштурулган.

* Мындан 3 жыл мурун, 2011-жылы Түркмөнстандын Абадан шаарына жакын жерде жайгашкан аскер бөлүгүнүн кампасы ысык аба ырайынан улам өрттөнүп кеткен. Жарылуудан снаряддар 30 чакырым алыстыкка чейин учушкан. Бийлик жарылуунун кесепетинен 15 киши өлдү деген менен, укук коргоочулар 1300дөн ашуун киши өлдү деп билдиришкен.

* Мындан 4 жыл мурун, 2010-жылы Кыргызстандын экс-муфтийи Мураталы ажы Жуманов 37 жашында ашказан рагынан улам көз жумган. Ал 8-июлда Ноокат районундагы туулган айылы Ынтымакта жерге берилген.

7-июлда Кыргызстанда жана дүйнөдө орун алган окуялар тууралуу кененирээк бул жактан окуй аласыздар.

Автор: Айпери Ганыжан кызы