Парламентте жарандардын кайрылууларын кабыл алуу үчүн атайын рубрика иштеп жатат

“Жарандардын кайрылууларын кароо тартиби жөнүндө” мыйзам талаптарына ылайык, Жогорку Кеңеште кайрылууларды кабыл алуунун электрондук рубрикасы иштеп жатат. Бул тууралуу бүгүн, 7-июлда ЖКнын басма сөз кызматы кабарлады.

Маалым болгондой, эми жарандар өздөрүнүн жазуу жүзүндөгү кайрылууларын kattar@kenesh.kg электрондук дарегине жөнөтө алышат. Электрондук почтага келип түшкөн кайрылууларды кароо тартибине ылайык, жарандар өздөрүнүн кайрылууларында сөзсүз кайрылуу жөнөтүлүп жаткан мамлекеттик органдын аталышын же кызмат адамынын аты-жөнүн көрсөтүүгө тийиш. Андан сырткары электрондук кайрылууга көчүрмөлөрдү, анын ичинде электрондук документтердин көчүрүлүп алынган нускаларын, интернет торчосундагы электрондук файлдар жайгаштырылган даректерди тиркөөгө жол берилет.