Республикалык жол-кайгуул кызматы пара талап кылган инспектордун иши боюнча кызматтык иликтөө жүргүзүлөрүн айтты

Түп районунан студенттер менен келе жаткан айдоочудан пара талап кылган жол-кайгуул кызматкери боюнча кызматтык иликтөө жүргүзүлөт. Бул тууралуу Республикалык жол-кайгуул кызматынан бүгүн, 7-июлда кабарлашты.

Республикалык жол-кайгуул кызматынан билдиришкендей, бүгүн студенттер Жол-кайгуул кызматынын жетекчилиги менен жолугушуп, МАИ кызматкеринин пара талап кылгандыгы боюнча видеону берип кетишкен. Бул факты боюнча кызматтык иликтөө жүргүзүлөт жана аталган кызматкердин күнөөсү аныктала турган болсо, тиешелүү чаралар көрүлөт.

Эске салсак, 6-июлда Ысык-Көл облусунда жол-кайгуул кызматкерине 10 миң сом пара бербеген айдоочу камакка алынганы тууралуу маалымат тараган. Түп районунун жол-кайгуул кызматкери тосуп, маршруттук таксинин ээси Замирбек Жороевди "спирт ичимдигин ичкен" деген айып менен убактылуу кармоочу жайга камап, унаасын атайын токтотуучу жайга токтотуп койгону айтылган.

Аталган район боюнча Жол-кайгуул кызматынын ага инспектору Мурат Жумабаев бүгүн, 7-июлда SUPER.KG порталына студенттер менен келе жаткан айдоочудан пара алуу фактысы боюнча маалыматы жок экенин айтып, эреже бузган айдоочунун иши сотто караларын билдирген болчу.