Жалал-Абадда "атасын өлтүрүп, анын 13 жаштагы кызын зордуктап салды" деп шектелген жаран колго түшүрүлдү

Жалал-Абадда "44 жаштагы жаранды өлтүрүп, анын кызын өзү менен алып кетип зордуктап салды" деп шектелген жаран колго түшүрүлдү. Бул боюнча Жалал-Абад ОИИБинин басма сөз кызматы бүгүн, 11-июлда билдирди.

Эске салсак, Жалал-Абад шаарындагы Жеңиш кичи районунда 9-июль күнү Исак Ботобаевдин жансыз денеси табылган. Ал эми анын 13 жаштагы кызы дайынсыз жоголгон. Маалыматка ылайык, каза болгон жаран Сузак районунун тургуну болгон. Ал кызы менен Жалал-Абад шаарында убактылуу жашап турган.

Ыкчам иликтөө иштеринин натыйжасында аталган кылмышка шектүү катары Шамалды-Сай шаарчасынын тургуну кармалган. Ал мурда адам өлтүрүү, каракчылык жана зордуктоо менен соттолгон, 1970-жылы туулган Көчөров К.А. экени аныкталган.

Тергөө иштеринин жүрүшүндө кылмышка шектүү делген Көчөров К.А. өзү менен кошо Айперини алып жүргөнү жана аны зордуктаганы белгилүү болгон. Бул окуя боюнча соттук-биологиялык жана соттук-медициналык экспертизалар дайындалып, тергөө иштери улантылууда.

Азыркы тапта К.А.Көчөров камакка алынып, Жалал-Абад ШИИБинин убактылуу кармоочу жайына киргизилди.

Автор: Мирлан Өмүралиев