Тогуз-Торо районунда Нарын дарыясынын 47 гектар жээгин суу жеп кетип, жээктеги айылга коркунуч жаралууда

Тогуз-Торо районунда Нарын дарыясынын 47 гектар жээгин суу жеп кетип, жээктеги айылга коркунуч жаралууда. Бул боюнча ӨКМнын басма сөз кызматы бүгүн, 11-июлда билдирди.

Маалыматка ылайык, Жалал-облусунун Тогуз-Торо районунун Сары-Булуң айыл аймагына караштуу Жылан-Уюк участкасынан жер алдынан чыккан суулар 2010-жылдан бери 30дан ашык турак үйлөрдү, ички чарбалык жолдорду жана айдоо аянттарды каптап, жараксыз абалга алып келген. КРнын Өзгөчө кырдаалдар министрлигинин уюштуруусу менен аймакта ыктыярдуу куткаруу кызматы түзүлүп, алардын демилгеси менен кооптуу жердин алдын алуу боюнча суунун нугун буруу иш-чаралары аткарылган.

Ошондой эле Жалал-Абад облусунун Тогуз-Торо районунун Казарман айылынын ортосунан аралап өткөн Нарын дарыясынын ашыкча суусу Кара-Суу айылын көздөй 47 гектар жээгин суу жеп кеткен. Нарын дарыясы 2010-жылдан берки аралыкта токой чарбаларын жана айдоо аянттарын толугу менен алып, азыркы күндө айылдын турак жайларына жана ички чарбалык жолдорго жакындап калган. Бул боюнча Өзгөчө кырдаалдар министрлигинин адистери тарабынан атайын мониторинг жүргүзүү иштери каралууда.

Автор: Мирлан Өмүралиев