Бишкекте "чет элдик ишкерди тоногон" деген шек менен уюшкан кылмыштуу топтун мүчөлөрү кармалды

Бишкекте "чет элдик ишкерди тоногон" деген шек менен уюшкан кылмыштуу топтун мүчөлөрү кармалды. Бул тууралуу ИИМдин басма сөз кызматы бүгүн, 15-июлда билдирди.

Маалыматтарга караганда, чет элдик ишкер июнь айында жума намазынан чыгып келе жатканда белгисиз адамдар күч колдонуп унаага отургузушуп, кийин 5 миң АКШ долларын тартып алышкан да, из жашырып кетишкен.

Бул окуя боюнча кылмыш иши козголуп, иликтөө иштери башталган. Жүргүзүлгөн иш-аракеттердин негизинде ИИМдин Уюшкан кылмыштуулукка каршы башкы башкармалыгы тарабынан аталган кылмышка шектүү катары “смотрящий” деген криминалдык статусу бар Н.А. аттуу Кара-Балта шаарынын тургуну жана уюшкан кылмыштуу топтун мүчөсү болгон Д.Б. аттуу жаран кармалган. Учурда аталган окуя боюнча тергөө амалдары жүрүүдө.

Автор: Мирлан Өмүралиев