Таш-Көмүрдө оодарылган унаа толугу менен күйүп, 13 жаштагы бала жаракат алды

Жарандык коргонуунун Өрткө каршы күрөшүү кызматынын маалыматы боюнча, өткөн суткада республиканын аймагында 13 өрт кырсыгы катталып, аларды өчүрүүгө 14 өрт өчүрүү бөлүмү тартылган.

Ала-Бука районунда отко этиятсыз мамиле кылгандан улам М.Умарованын 40 чарчы метр жыгач устундуу, шифер жабылган бастырмасы өрттөнгөн. Анда 200 боо жүгөрү бакалы күйгөн.

Аксы районуна караштуу Кара-Жыгач айыл өкмөтүндө 1990-жылы туулган Абдылда уулу Эрлан Скания 113 үлгүсүндөгү жүк ташуучу автоунааны башкарып бара жаткан. Автоунаадагы 300 даана түк чөп электр зымына тийип өрт чыгып, толугу менен күйгөн.

Таш-Көмүр шаарында Фольскваген Пассат универсал автоунаанын ээси Шеримбай Абдураимов мас абалында автоунааны башкара албай, унаа толугу менен күйгөн. Ичиндеги 2001-жылы туулган баласы Бекзат Абдураимов жеңил жаракат алган. Бул тууралуу 22-июлда ӨКМнын басма сөз кызматы билдирди.

Автор: Айпери Ганыжан кызы