Американын Бостон шаарындагы жардыруу боюнча айыпталган ага-ини Царнаевдердин биринин классташы кармалды

2013-жылдын 15-апрелинде АКШнын Бостон шаарында өткөн марафон учурунда эки жардыруу боюнча айыпталган ага-ини Жохар жана Тамерлан Царнаевдердин жакын адамы, 21 жаштагы Стивен Силва кармалды. Бул тууралуу бүгүн, 23-июлда чет өлкөлүк басылмалар жазып чыгышты.

Маалыматка ылайык, ага “баңгизат жана сериялык белгиси өчүрүлгөн курал-жарак сактоо" деген айып тагылууда. “Стивен Силва Жохар Царнаев менен мектепте бир класста окуп, андан соң Массачусетс университетинде бирге окуган” деп жазышты басылмалар.

Эскерте кетсек, "2013-жылдын 15-апрелинде Бостон шаарында өткөн марафон учурунда эки жардырууну жасаган" деп шектелип Жохар Царнаев 19-апрелде кармалган. Ал эми анын агасы Тамерлан Царнаев 18-апрелде аталган окуядан соң полиция кызматкерлери менен атышуу учурунда окко учкандыгы айтылган. Жарылуунун натыйжасында 4 адам каза болуп, 183ү жаракат алган. Мындан тышкары 2014-жылдын 2-июнунда “АКШнын Бостон шаарындагы жардырууга тиешеси бар” деп айыпталып 23 жаштагы кыргызстандык Хайрулложон Матанов колго түшүрүлгөнү боюнча маалыматтар тараган.

Автор: Нургазы Аматов