Өкмөт башчы Баалуу металлдар департаментинин директору Молдобазар Эркебаевди кызматынан бошотту

Өлкөнүн Каржы министрлигине караштуу Баалуу металлдар департаментинин директору Молдобазар Эркебаев ээлеген кызматынан бошотулду. Тиешелүү буйрукка премьер-министр Жоомарт Оторбаев бүгүн, 24-июлда кол койгонун өкмөттүн басма сөз кызматы билдирди.

Эркебаев бул кызматка 2013-жылдын 11-ноябрында мурдагы премьер-министр Жантөрө Сатыбалдиевдин буйругу менен келген.

Айта кетсек, 22-июлда Жогорку Кеңештеги көпчүлүк коалициясы Оторбаевден Ош, Жалал-Абад облустарын кайра калыбына келтирүү боюнча дирекцияда Сатыбалдиев менен бирге иштеген чиновниктерди кызматтан кетирүүнү суранган болчу. Алардын катарында Эркебаев да бар эле.