Асылбек Жээнбеков Масахиса Сато баштаган Япония парламентинин депутаттары менен жолугушту

Жогорку Кеңештин төрагасы Асылбек Жээнбеков 2-августта Кыргызстанга иш сапары менен келген Япония парламентинин депутаты Масахиса Сато баштаган япон делегациясы менен жолугушту. Бул тууралуу ЖКнын басма сөз кызматы билдирди.

Жолугушууда Масахиса Сато Япония парламентинин Кеңешчилер палатасынын депутаттарынын Кыргызстанга болгон алгачкы иш сапары экенин белгилеп, алардын негизги максаты эки тараптуу мамилелерди мындан ары дагы бекемдөө, япон өкмөтүнүн колдоосу менен ишке ашырылып жаткан долбоорлор менен таанышуу экенин айтып өттү.

Тараптар Кыргыз Республикасынын Президенти Алмазбек Атамбаевдин Японияга болгон расмий иш сапары эки өлкөнүн ортосундагы кызматташтыкты өнүктүрүүгө, өз ара ишенимди бекемдөөгө чоң түрткү бергенин белгилеп кетишти.

Өз сөзүндө төрага Асылбек Жээнбеков Кыргызстандын кен байлыктарынын, энергетикалык ресурстарынын чети да оюла элек экенине токтолуп, экологиялык жактан таза айыл чарба продукцияларын өндүрүүнүн мүмкүнчүлүктөрү чоң экендигин айтуу менен инвестиция тартуу аркылуу кызматташа турган тармактарга япон кесиптештеринин көңүлүн бурду.

Эки тараптуу талкуунун жүрүшүндө Кыргызстанда парламенттик демократиянын өнүгүшү, анын келип чыгуу тарыхы, парламенттер аралык кызматташтыкты чыңдоонун мындан аркы багыттары, Жогорку Кеңештин төрагасы Асылбек Жээнбековдун Японияга боло турган расмий иш сапарынын мааниси туурасында кеңири сөз болду.

Автор: Айпери Ганыжан кызы