Токмокто тургундар "экологияга зыян" деп мунай заводунун ишин токтотууну талап кылышууда

Токмокто мунайды кайра иштетүүчү заводдун жабылышын талап кылып 40тай адам нааразычылык иш-чарасына чыкты. Бул тууралуу SUPER.KG порталына митингге катышып жаткан "Чоролор" тобунун лидери Замирбек Көчөрбаев билдирди.

Анын айтымында, завод экологияга зыян келтирип жатат. Эгерде 15-сентябрга чейин заводду жаптыруу боюнча талаптары аткарылбаса, радикалдуу кадамдарга барышарын айтышууда.

Токмок мэри Жанузак Сатыбалдиев чогулган эл менен жолугушуп, талаптарын өкмөткө жеткирүүгө убада кылганын кошумчалады.

Заводду Кытайдын Синьцзянь-Уйгур автономиялуу районунун "Мунай-химия" корпорациясы салган. Бирок завод ишке кире элек.