"Ар бир жаран мамлекеттүүлүктүн баасын түшүнүүсү зарыл" деди Эльвира Сариева

Бүгүн, 1-сентябрда Кыргыз Республикасынын Вице-премьер-министри Эльвира Сариева Бишкек шаарынын №69-орто мектебинде “2014-жыл – Мамлекеттүүлүктү бекемдөө жылы” темасына арналган ачык сабагын өттү. Сабакты ачып жатып Эльвира Сариева "ар бир жаран эгемендүү мамлекеттүүлүктүн баасын түшүнүүсү зарыл" деп билдирди. Бул тууралуу өкмөттүн басма сөз кызматы маалымдады.

"Мектептеги биринчи күн жана алгачкы сабак өмүр бою эсте калат. Ошондуктан Кыргыз Республикасынын өнүгүүсүнө колдон келген салымын киргизүүгө, анын негиздерин чыңдоого даяр жаранды интеллектуалдык жана рухий жактан тарбиялоодогу мектептин, билим алуунун маанисин баалабай коюу мүмкүн эмес. Ар бирибиз балдарды айныксыз чындыктарга үйрөтүүбүз зарыл, алардын сөз жүзүндө эмес, иш жүзүндө өз өлкөсүнүн анык патриоту болуп жетилишине көмөктөшүүбүз зарыл",- деди ал.

Анын айтымында, Кыргызстан адамдык мүмкүндүктү билим берүү тутуму аркылуу өнүктүрүүгө карата каражатты көбүрөөк салышы керек. «Окуу шартынын жакшыртылышы жана алдынкы ыкмаларды пайдалануу өлкөнүн билим деңгээлин жогорулатууга көмөк берет. Борбордук №69-орто мектеп кыргыз тилинде билим берүүчү бирден-бир инновациялык борборлордун бири болуп саналат. Модернизациялоо программасына ылайык, бүткүл республика боюнча 100 мектеп заманбап лабораториялык жана компьютердик жабдууга ээ болду. Бардык кадамдар, анын ичинде бала бакчаларды лицензиялаштырууну жөнөкөйлөтүү, мектептердин финансылык өз алдынчалыгын жогорулатуу, профессионалдык билим берүүнү жакшыртуу кадамы өлкөдөгү билим берүү сапатын жана деңгээлин жогорулатууга багытталган»,- деди Эльвира Сариева.

Сабакты жыйынтыктоодо вице-премьер-министр Эльвира Сариева мектеп окуучуларын дагы бир ирет жаңы окуу жылынын башталышы менен куттуктап, аларга чың ден соолук жана айлана-чөйрөнү таанууда ийгиликтерге жетишүүсүн каалады.

Белгилесек, бүгүн, Билим күнү Бишкек жана Чүй облусундагы мектептериндеги ачык сабактарды вице-премьер-министрлер жана Кыргыз Республикасынын Өкмөтүнүн бир катар мүчөлөрү өткөргөн.

Автор: Айпери Ганыжан кызы