"Кемин районунда өзүнүн эки уулун муунтуп өлтүрдү" деп шектелген аял баш коргоо чарасы менен эки айга камалды

"Кемин районунда өзүнүн эки уулун муунтуп өлтүрдү" деп шектелип кармалган Орловка айылынын 28 жаштагы тургуну Т.Ольга баш коргоо чарасы менен эки айга камалды. Бул тууралуу 1-сентябрда Чүй ОИИББинин басма сөз кызматы билдирди.

Белгилүү болгондой, 29-август күнү саат 21:40 чамасында Кемин РИИБине Орловкадагы ооруканага 7 жана 3 жаштагы балдардын жансыз денеси жеткирилгени боюнча маалымат түшкөн. Окуя болгон жерге барган укук коргоо органдары балдарды өз энеси муунтуп өлтүргөнүн тастыкташкан.

Факты боюнча кылмыш иши козголуп, тергөөнүн жүрүшүндө кылмышка шектелген айым күнөөсүн мойнуна алган. "Бул боюнча соттук-медициналык, соттук-психиатриялык экспертиза дайындалып, иликтөө иштери жүрүүдө. Экспертизанын жыйынтыгында шектүү психиатриялык жактан жабыркабаган болсо, ал 12 жылга чейин эркинен ажыратылат" деп айтылат маалыматта.

Автор: Айпери Ганыжан кызы