Депутаттар эл аралык маанидеги унаа жолдорду тоскондорго чара көрүү боюнча мыйзам долбоорун жактырышты

Парламенттин Мыйзамдуулук, укук тартиби жана кылмыштуулук менен күрөшүү комитетинин бүгүнкү отурумунда эл аралык маанидеги унаа жолдорду тоскондорго чара көрүү жөнүндөгү мыйзам долбоору талкууга коюлуп, экинчи окууда добуш берүүгө жиберилди.

Демилгечи депутат Майрамбек Расулов бул мыйзам долбоору эл аралык мааниге ээ болгон унаа жолдорду тоскондордун административдик жоопкерчилигин күчөтүүгө багыттала турганына токтолду.

"Мыйзамда жол тосуу тартип менен көрсөтүлгөн. Макул, жолду тосушсун, бирок башка адамдарга тоскоолдук жаратпашы керек. Анан 23 же 24 саат бою чоң жолду тосуп туруп алса, ага жоопкерчилик каралышы керек",- деди.

Депутат Галина Скрипкина стратегиялык маанидеги жолдор тосулбашы керектигин айтты.

"Мен бул мыйзам долбоорун колдоого алам. Жол тосулбашы керек. Нааразы болуп жолду тоспостон, тынчтык митингине чыгышса болот. Бирок мыйзамга каршы аракеттерге барбашы зарыл",- деди депутат.

Талкуудан соң мыйзам долбоору экинчи окууда добуш берүүгө жиберилди.

Автор: Жамалидин Парманкулов