Кырсык болгон жерден качып кеткен айдоочуларды 10 жылга чейин эркинен ажыратуу сунушталууда

Жогорку Кеңештин Мыйзамдуулук, укук тартиби жана кылмыштуулук менен күрөшүү боюнча комитетинин 9-сентябрдагы жыйынында жол эрежесин бузган айдоочуларды айдоочулук укуктан ажыратуу жана кылмыш жазанын жаңы түрүн киргизүүгө багытталган мыйзам долбоору каралды. Мыйзам долбоордун демилгечиси - вице-спикер Төрөбай Зулпукаров. Айтымында, унаа менен жолдо жүрүүдө бейбаштык кылса, жол эрежелерин бузуп, адам өмүрү кыйылса, жазага тартуу азыркыдан күчөтүлөт.

“Унаа жарышына түшүп же дагы башка себептер менен бейбаштык кылса, 300 сомдон 500 сомго чейин айып пул салынат. Андан сырткары айдоочу кырсык болгон жерди таштап качып кетсе жана жол кыймылынын бузулуусунан адамдардын ден соолугуна зыян тийсе же өмүрү кыйылса, үч жылдык айдоочулук укуктан ажырайт, же болбосо 5 жылдан 10 жылга чейин эркинен ажыратылат”,- деди вице спикер.