2014-жылдын 8 айында республикалык бюджеттин чыгаша бөлүгү 63,3 миллиард сомду түздү

2014-жылдын январь-август айларында республикалык бюджеттин чыгаша бөлүгү (атайын каражаттарды кошпогондо жана мамлекеттик карызды эсепке алганда) 63 миллиард 305,5 миллион сомду түзүп, план 91,9 пайызга аткарылды. Бул тууралуу Каржы министрлигинин басма сөз кызматы билдирди.

Маалыматка караганда, өткөн жылдын тийиштүү мезгилинде республикалык бюджеттин аткарылышы 56 миллиард 102 миллион сомду түзгөн. Былтыркы жылдын ушул мезгилине салыштырганда жалпы чыгашалар 7 миллиард 203,5 миллион сомго же 12,8 пайызга көбөйдү. Ички дүң продуктунун көлөмүнө карата республикалык бюджеттин жалпы чыгашалары өткөн жылдын ушул мезгилине салыштырмалуу 0,5 пайызга көбөйүү менен 29 пайызды түздү.

2014-жылдын январь-август айларында республикалык бюджеттен чыгашалардын корголгон беренелери боюнча 45 миллиард 14,7 миллион сом каржыланып, план 94,4 пайызга аткарылды. 2013-жылдын ушул мезгилиндеги көрсөткүчтөр менен салыштырганда каржылоо 12,6 пайызга же 5 миллиард 41,5 миллион сомго көбөйдү.

2014-жылдын январь-август айларында республикалык бюджеттен чыгашалардын корголбогон беренелери боюнча 4 миллиард 814,5 миллион сомго каржыланып, план 87,5 пайызга аткарылды. 2013-жылдын ушул мезгилиндеги көрсөткүчтөр менен салыштырганда каржылоо 333,2 миллион сомго азайды.

Автор: Айпери Ганыжан кызы