Студент, пенсионерлер киреше декларациясын берүүчү жалпы жарандардын тизмесинен чыгарылат

“Жалпы жарандар 2012-жыл үчүн 2013-жылдан тарта декларация бере баштоого тийиш эле, бирок өкмөттүн буга даярдыгы жетишсиз, даярдык көрүү иштери быйыл жыл аягына чейин толук аяктоого тийиш. Буга байланыштуу жалпы жарандардын кирешеси тууралуу декларация берүү мөөнөтүн 2014-жылга жылдырууну өкмөт сунуштайт”,- деди ЖКда Мамлекеттик салык кызматынын төрагасы Исхак Масалиев. Ал ошондой эле бир жыл ичинде элге атайын түшүндүрүү иштери жүргүзүлө тургандыгын да билдирди. Депутат Абдыманап Кутушев жеке мүлкү же киреше жок студент, пенсионер сындуу жарандарды тизмеден чыгарып салууну сунуштап, Масалиев буга макулдугун билдирди. Мыйзам долбоору биринчи окууда добуш берүүгө жөнөтүлдү.

Автор: Гүлмайрам Сабырбекова