Кара-Буура районунун тургуну "23 уйду уурдап, коңшу Казакстанга сатып жиберген" деп шектелүүдө

Кара-Буура районунун тургуну "23 уйду уурдап кеткен" деп шектелүүдө. Бул тууралуу ИИМден бүгүн, 3-октябрда кабарлашты. Маалыматка ылайык, ушул жылдын 11-августунда Кара-Буурадагы Көк-Сай айылындагы Суулуу-Арыбек жайытынан белгисиз жарандар жергиликтүү тургунга тиешелүү болгон 23 уйду уурдап качышкан. Бул тууралуу укук коргоо органдарына кабарланып, иликтөө иштери башталган.

Жакынкы аралыкта аталган кылмышка шектүү катары ошол эле Көк-Сай айылынын 47 жаштагы тургуну, мурда соттолгон Б.С. кармалды. Иликтөөдө кылмышкерлер уйларды коңшу Казакстанга алып барып, 1 миллион теңгеге сатып жиберишкени маалым болду. Мындан тышкары шектүү катары кармалган жарандын үйүн тинтүүдө 12 килограммдан ашык марихуана табылган. Учурда шектүү адам камакка алынып, иликтөө иштери жүрүп жатат.

Автор: Мирлан Өмүралиев