Вице-мэр: "Ош шаарындагы 3 миңден ашуун аз камсыз болгон үй-бүлөлөргө электр мештери берилет"

Ош шаарында аз камсыз болгон жана муктаж үй-бүлөлөрдүн саны 5 миңден ашуун. Бул тууралуу SUPER.KG порталына бүгүн, 14-октябрда Ош шаарынын вице-мэри Абдрахман уулу Кутманалы билдирди.

"Кышкы жылуулук мезгилине карата жүргүзүлгөн иш-чаралардын алкагында бүгүн өтө муктаж болгон 70 үй-бүлөгө электр мештери таратылат. Жалпысынан шаар боюнча көп кабаттуу турак жайларда жашаган 3451 үй-бүлөгө электр мештери берилмекчи. Ал эми 1771 үй-бүлөгө газ баллондор таратылат",- дейт вице-мэр.

Анын айтымында, учурда газ баллондор келе элек, алар 25-октябрга чейин толугу менен таратылат. Ал эми электр мештерди кварталдык комитеттер 2 күндүн ичинде толугу менен таратып бүтмөкчү.

Ошондой эле буга чейин жергиликтүү тургундарга көмүр сатуу боюнча мэрия 2 ишкана менен келишим түзгөнү маалым.

Автор: Мальвина Уметбекова