Ош-Араван унаа жолунан унаадан Калашников үлгүсүндөгү автомат алынды

ИИМдин Түштүк аймактар боюнча уюшкан кылмыштуулук менен күрөшүү башкармалыгынын кызматкерлери тарабынан Ош-Араван унаа жолунан унаадан Калашников үлгүсүндөгү автомат алынды. Бул тууралуу бүгүн, 5-ноябрда аталган мекеменин басма сөз кызматынан билдиришти.

Иликтөө иштеринин натыйжасында 4-ноябрда саат 12:00 чамасында Ош-Араван унаа жолунун 8-чакырымынан Мерседес-Бенц үлгүсүндөгү унаа токтотулган. Аны Араван айылынын 49 жаштагы тургуну башкарып бара жаткан. Тинтүү учурунда унаадан кара баштык табылган, анын ичинен 7,62 калибрлүү, октору жок Калашников автоматы алынган. Ал унаадагы 23 жаштагы Х.Б. аттуу жүргүнчүгө таандык экени аныкталган.

Бул иш боюнча КРнын Кылмыш-жаза кодексинин 241-беренеси (ок атуучу куралдарды, ок-дарыларды, жарылуучу заттарды жана жардыргыч түзүлүштөрдү мыйзамсыз алуу, берүү, өткөрүү, сактоо, ташуу же алып жүрүү) боюнча кылмыш иши козголду. Учурда Калашников автоматы кандай максат менен алганы такталып, тергөө амалдары жүрүүдө.

Автор: Мальвина Уметбекова
Фото: Уюшкан кылмыштуулук менен күрөшүү башкармалыгы