Бишкекте Кыргыз Эл жазуучусу, драматург Касымалы Жантөшевдин 110 жылдыгы белгиленет

Бүгүн, 10-ноябрда Бишкектеги Улуттук китепканада Кыргыз Эл жазуучусу, драматург Касымалы Жантөшевдин 110 жылдыгы белгиленет. Аталган китепканадан билдиришкендей, иш-чарада илимий-практикалык конференция жана К.Жантөшевдин тандалып алынган чыгармаларынын 5 томдук китебинин бет ачары болот. Ошондой эле “Калк кадырлаган талант” аталышындагы китеп көргөзмөсү ачылат. Анда жазуучунун жана драматургдун басып өткөн жолу жазылган гезиттердин, журналдардын макалалары коюлат.

Касымалы Жантөшев 1904-жылы Түп районунун Тепке айылында туулган. Фрунзедеги педтехникумду бүтүргөн. Чыгармачылык жолу ырлар жана пьесаларды жазуу менен башталган. “Карачач”, “Алым жана Мария”, “Дар-даш”, “Өч”, “Эл ырчысы” пьесалары, “Курманбек” драмасын жазган. Ошондой эле “Хан-теңирлик чабан”, “Каныбек” романдарын жараткан. Эки жолу Ардак белгиси ордени, медалдар, Жогорку Советтин Ардак грамоталары менен сыйланган. Ысык-Көл облустук драма театрына анын аты берилген. 1968-жылы 64 жаш курагында дүйнө салган.