Бишкек шаарынын тургунунан Калашников автоматына тиешелүү ок-дарылар табылды

Бишкек шаарынын тургунунун үйүнөн Калашников автоматынын жана көзгө атар мылтыктын ок-дарылары табылган. Бул тууралуу бүгүн, 13-ноябрда Бишкек ШИИББинин басма сөз кызматынан билдиришти.

Белгилүү болгондой, кечээ, 12-ноябрда милиция кызматкерлери тарабынан жүргүзүлгөн рейддин жүрүшүндө 28 жаштагы Келечек жаңы конушунун тургуну кармалган. Анын үйүн тинтүүгө алган учурда ага таандык баштыктын ичинен ок-дарылар чыккан. Учурда бул иш боюнча 241-беренеге (ок атуучу куралдарды, ок-дарыларды, жарылуучу заттарды жана жардыргыч түзүлүштөрдү мыйзамсыз алуу, берүү, өткөрүү, сактоо, ташуу же алып жүрүү) ылайык кылмыш иши козголуп, тергөө амалдары жүрүүдө.

Автор: Мальвина Уметбекова