Ошто тажрыйбалуу окутуучулар жаш мугалимдерге сабак учурунда түрдүү кырдаалдардан чыгуу жолдорун көрсөтүп беришти

Ош шаардык билим берүү башкармалыгына караштуу мектептердин башталгыч класстарынын окуу бөлүм башчылары үчүн “Мектеп администрациясынын жаш мугалимдер менен иштешүүсү” аттуу семинар өткөрүлдү. Бул тууралуу аталган башкармалыктан кабарлашты.

Маалыматка ылайык, анда мектепте жаңыдан иштеп баштаган жаш мугалимдерге сабак өтүп жатканда туш болгон түрдүү кырдаалдардан чыгуунун жолдорун тажрыйбалуу педагогдор окуучуларга ачык сабактарды өтүү менен көрсөтүп, түшүндүрүп беришти. Кошумча ата-энелер менен иштешүү, ата-энелер чогулушун кантип уюштуруу керектигин айтышты. Учурда Шаардык билим берүү башкармалыгына караштуу мектептердеги башталгыч класстардын мугалимдеринин саны 448 болсо, анын жарымын жаш мугалимдер түзөт.

Автор: Максат Кудайбердиев