"Дордойдун" "Алканов" базарында сатуучулар митингге чыгышты

Гүлия Малаева

Замирбек Амантаев

Нургүл Исмаилова

Асел Карабаева

Бүгүн, 4-февралда "Дордойдун" “Алканов” базарында сатуучулар митингге чыгышты. Себеби аталган базардын башчылары 1-февралдан баштап унаа токтотуучу жайдын баасын 20 сомдон 50 сомго, ал эми даараткананын баасын 5 сомдон 10 сомго көтөрүп жиберишкен.

Малаева Гүлия аттуу сатуучу: “Чыңгыз Алкановго 1-февралда барганбыз. Ал "мен бул жерде бий, мен бул жерде ханмын. Контейнериңерди көтөрүп алып каалаган жериңерге баргыла. Биздин мамлекетке тиешебиз жок, билгениңерди кылып алгыла" деген”,- дейт.

Амантаев Замирбек, сатуучу: “Бул базарда бардыгы болуп 24 катар, ар бир катарада 80ге жакын контейненер бар. Соода өзү жакшы болбой жатканда баалардын кымбатташы туура эмес”.

Нургүл Исмаилова, сатуучу: “Учурда нан 15 сом болуп жатканда даараткананын 10 сом болушу акылга сыйбайт. Баалардын жогорулашы - чектен ашкандык”. Ушул сыяктуу нааразычылыктарды угуп, бул маселе боюнча аталган базардын жетекчилиги менен сүйлөшүүгө барганбыз. Ал жерден “Алканов” базарынын профсоюздар уюмунун өкүлү Асел Карабаева төмөнкүлөргө токтолду: “Чыңгыз Райканович жолду оңдоп, жаңы автобустарды сатып алып, бул жакка көп автобустарды каттатам деген ойдо бул бааларды кымбаттаткан. Биз сатуучулар менен сүйлөшүп, бири-бирибизди түшүнгөндөй эле болгонбуз. Дааратканага болгон баанын көтөрүлүшү боюнча айтсам, бул даараткана жаңы салынган, бардык ыңгайлуу шарттар түзүлгөн, ичи таза, ысык суу агат. Сатуучуларга 5 сом, ал эми базарга келген элге 10 сом болот дегенбиз, бирок каршы пикирлер болгондуктан, төлөмдөр кайра мурдагы калыбына келтирилди. Ал эми унаа токтотуучу жайга төлөмдөр 50 сом эмес, 30 сомго көтөрүлмөй болду”.