Өткөн суткада өлкө аймагында 8 өрт кырсыгы катталып, Өзгөн шаарында турак үйдүн чатыры күйүп кетти

Жарандык коргонуунун Өрткө каршы күрөшүү кызматынын маалыматы боюнча, акыркы суткада өлкө аймагында 8 өрт кырсыгы катталып, аларды өчүрүүгө 8 өрт өчүрүү бөлүмү тартылган.

Өзгөчө кырдаалдар министрлигинин басма сөз кызматынын 11-декабрда берген маалыматына ылайык, Бишкек шаарында 1, Чүй облусунда 2, Ош облусунда 2, Жалал-Абад облусунда 1, Ысык-Көл облусунда 1, Нарын облусунда 1 өрт кырсыгы катталган.

Өзгөн шаарындагы үйлөрдүн биринде өрт кырсыгы катталды. Анын кесепетинен жыгач устундуу, шифер жабылган, аянты 40 чарчы метр турак үйдүн чатыры, 60 чарчы метр жыгач шыбы, 1 терезе жана 1 эшик толугу менен күйүп кетти. Өрттүн келип чыгуусуна жылытуучу мештерди жана морлорду колдонууда эреженин бузулушу себеп болгон. Ошондой эле Жумгал районуна караштуу Көк-Ой айылында турак үйдүн 3 бөлмөсүндө аянты 40,5 чарчы метр жыгач шыбы, жыгач полу жана үй эмеректери күйүп кетти. Өрттүн келип чыгуусуна электр жабдууларын пайдаланууда техникалык эреженин бузулушу себеп болгон

Автор: Мальвина Уметбекова