Бишкекте үй-бүлө чебин бекем курууга багытталган "Бар үмүтүм сенде" аттуу тасма көрсөтүлдү

Тасманын режиссёру Турусбек Жумалиев.

Тасманын каармандарын ойношкон жаш актёрлор.

Бүгүн, 8-январда Бишкектеги кинотеатрлардын биринде жашоо чындыгын чагылдырган “Бар үмүтүм сенде” аталышындагы көркөм тасманын бет ачары болду. Фильмдин башкы каармандарын Нурсултан Урматов, Наргиза Осмонова, Залкар Карымшаков,Эльвира Жумалиева жана башкалар ойношкон.

Тасмада 4 баланын энеси, психикалык жактан жабыр тартып, үй-бүлөсүн санаага салган 40 жаштагы Назик аттуу айымдын жашоосу чагылдырылган. Жашагысы келбей, ачуусу бат келип, күнүгө жаңжал чыгарган ал акыры ооруканага жаткырылат. Буга чейин Назик жасап келген үй жумушу, балдарды кароо өңдүү түйшүктөр күйөөсү Адиске жүктөлөт. Тагдырдын берген сыноосуна сынбай, Адис кайраттуулугу менен кыйынчылыкты жеңип, мээрими менен аялын айыктырып, үй-бүлөсүн сактап калат.

Аталган фильмдин сценарийинин автору жана режиссёру - КРнын Эмгек сиңирген артисти Турусбек Жумалиев. “Тасма кыргызстандыктар өздөрүнүн үй-бүлөлүк пирамидасын бекем куруп, эч качан ажырашпай жашашса деген максатта жаралды. Үй-бүлөнүн башына оорчулук түшсө, андайда жубайлар ажырашып кетишет. Тасма менен кыйынчылыктарга баш ийбей, аларды жеңсе, баары өз нугуна түшөрүн көрсөтүүнү көздөдүк. Фильмди көргөн көрүүчүлөр балдарын тирүүлөй жетим калтырбай, аларга туура тарбия берип, кыйынчылыктарын эч кимге билгизбей жашап, кыз-жигит болуп жүргөн кездеги сүйүүсүн өмүрүнүн аягына чейин сактап калат деген үмүттөмүн. Тасма алты ай тартылды. Ага досторум, санаалаштарым мүмкүнчүлүктөрүнө жараша каражат беришип, демөөрчү болушту”,- дейт Турусбек Жумалиев.

Буга чейин кыска метраждуу фильмдерге тартылып келген, башкы каармандын ролун жараткан Нурсултан Урматов: “Мен өзүмдөн улуу каармандын образын жараттым. Тасмадагы жубайым менден улуу көрүнөт. Мени бул ролго бекитишкенде театр чеберлери ооруган аял күйөөсүнөн бир топ улуу көрүнүп каларын айтышты. Ошондуктан чындыкка дал келген каармандар болушту. Өзүмдүн каарманымдан тарбия алдым, бул жашоодо камкор ата, мээримдүү күйөө болсоң, баарын жеңсе мүмкүн экенине ынандым”,- дейт.