Жылнаама, 9-январь: Мындан 33 жыл мурун Улуу Британиянын ханбийкеси Кейт Миддлтон төрөлгөн

* Мындан 47 жыл мурун, 1968-жылы Сакиш атка конгон актриса, куудул Айнура Турганбаева Аламүдүн районунун Стрельников айылында төрөлгөн. Мектепти бүтөрү менен Кыргыз драма театрынын алдындагы эки жылдык студияга тапшырган. Аны аяктаган соң Жаштар театрында иштеп калган. Сакиш деп аталып калышынын себеби, Марат Жанталиев экөө “Кимдин баласы?” деген спектаклде жубайлардын ролун ойношкон. Анда күйөөсүнүн аты Бопуш, аялынын аты Сакиш болгон. Ошондон кийин көпчүлүк аларды Сакиш, Бопуш деп атап калышкан.

* Мындан 45 жыл мурун, 1970-жылы бельгиялык ырчы, композитор, актриса Лара Фабиан Бельгиянын Эттерберк шаарында туулган. "Мен сени сүйөм" ("Je T’aime") жана "Адажио" ("Adagio") деген хит ырлардын аткаруучусу Лара Фабиандын чыныгы фамилиясы - Крокарт. Ырчынын апасы Италиядан, атасы бельгиялык болгон. Лара 5 жашка чыкканга чейин Сицилияда жашап, кийин Бельгияга көчүп келишкен.

Фабиан бала кезинен эле ырчы болууну кыялданып, музыка, бий ийримдерине катышып келген. 14 жашынан атасынын гитара чертүүсү алдында клубдарда ырдап, андан соң европалык музыкалык сынактарга катыша баштайт. Ырчы катышкан сынактардын эң эле абройлуусу "Евровидение" сынагы болгон. 1988-жылы "Евровидение" сынагына Люксембургдун атынан катышып, 4-орунду алган.

* Мындан 33 жыл мурун, 1982-жылы Улуу Британиянын ханбийкеси Кейт Миддлтон Англиянын Рединг шаарында төрөлгөн. Толук аты-жөнү – Кэтрин Элизабет Миддлтон. Ал орто билимди Мальборо колледжинен алып, 2001-жылы Сент-Эндрюс университетине тапшырган. Кэтрин ханзаада Уильям менен 2002-жылы Шотландиянын Сент-Эндрюсс университетинде окуп жүргөндө таанышкан. Ошол күндөн тарта эки жаш алгач дос болуп жүрүшүп, көп өтпөй чогуу жашап башташкан. Кылымдын тоюна айланган Кейт Миддлтон менен ханзаада Уильямдын тою 2011-жылы 29-апрелде болуп өткөн. Ал эми түгөйлөр 2013-жылдын 22-июлунда Георг Александр Луи аттуу уулдуу болушкан.

* Мындан 19 жыл мурун, 1996-жылы Дагестандын Кизляр шаарында Салман Радуевдин согушчандары төрөткана менен бейтапкананы басып алышып, 3700 адамды туткундашкан. Террорчулар Чеченстандан Орусиянын армиясынын чыгып кетүүсүн талап кылышкан эле.

9-январда Кыргызстанда жана дүйнөдө орун алган окуялар тууралуу кененирээк бул жактан окуй аласыздар.

Автор: Гүлзат Мамытканова