Бакай-Ата районундагы орто мектепти капиталдык оңдоп-түзөөдөн өткөрүү боюнча кылмыш иши козголду

Бакай-Ата районундагы мектепти капиталдык оңдоп-түзөөдөн өткөрүү боюнча кылмыш иши козголду. Бул тууралуу Башкы прокуратуранын басма сөз кызматы бүгүн, 12-январда билдирди.

Маалыматка караганда, 2014-жылы аталган райондун Акназаров айыл өкмөтүндөгү орто мектепти оңдоп-түзөөдөн өткөрүү боюнча тендер жарыяланып, “А” ишканасы жеңүүчү аталган. Ишкана 2,8 миллион сомго мектепти капиталдык оңдоп-түзөөдөн өткөрүүгө макул болгон. Бирок Акназаров айыл өкмөтүнүн кызмат адамдары мыйзамды бузуу менен тендердик комиссиянын чечимин жокко чыгарып, оңдоп-түзөө үчүн 3,3 миллион сом сунуштаган “А.С.П.” ишканасын жеңүүчү кылышкан. Учурда Талас облустук прокуратурасы тарабынан кылмыш иши козголуп, тергөө амалдары жүрүп жатат.

Автор: Бекжан Рыскулов