Баңгизаттарды көзөмөлдөө органдарынын укуктары жогорулатылууда

Баңгизаттарды көзөмөлдөө органдарынын укуктарын жогорулатуу сунушталууда. Тийиштүү мыйзам долбоорун Жогорку Кеңештин Мыйзамдуулук, укук тартиби жана кылмышка каршы күрөшүү комитети 13-январда 2-окууда талкуулады. Депутаттардын суроолоруна Баңгизаттарды көзөмөлдөө боюнча агенттиктин директору Алымбай Султанов жооп берди.

Султанов долбоор аркылуу "Кыргыз Республикасынын баңгизаттарды көзөмөлдөө боюнча органы жөнүндө", "Кыргыз Республикасынын жарандарынын жалпыга бирдей аскердик милдети жөнүндө" аскердик жана альтернативдик кызматтар жөнүндө", "Аскердик наамдарды, класстык чиндерди, атайын класстык чиндерди жана атайын наамдарды белгилөө жөнүндө" мыйзамдарга түзөтүүлөр сунушталып жатканын айтты.

Жарандардын администрациялык укук бузгандыгы жана кылмыш жасагандыгына шектенүүгө жетиштүү далилдер болсо, жарандардын жеке өздөрүн кароону, алардын буюмдарын, кол жүктөрүн, автоунаасын кароону, протоколдорду түзүүнү, буюм заттарын, каражаттарын жана документтерин алууну жүзөгө ашырууга баңгизаттарды көзөмөлдөө органынын кызматкерлерине мүмкүндүк берүү каралган.

Автор: Жамалидин Парманкулов