Кызамык оорусу күч алганына байланыштуу Саламаттыкты сактоо департаменти балдарды эмдөөдөн өткөрүү зарылдыгын айтууда

Кызамык оорусунун жайылышына байланыштуу Саламаттыкты сактоо департаменти аталган оорунун алдын алуу үчүн ата-энелерди балдарын кызамыкка каршы эмдөөгө чакырды. Бул тууралуу билдирүүнү бүгүн, 19-январда шаардык мэрия таратты.

Маалыматта белгиленгендей, мурда кызамык оорусу менен оорубаган жана эмдөөдөн өтө элек балдарга дароо эмдөө жасатуу абзел. Кызамык оорусун алдын алуунун эффективдүү ыкмасы - эмдөө. Биринчи эмдөө балдарга 12 айында жана экинчи жолу 6 жашында жүргүзүлөт.

"Урматтуу ата-эне, эгер сиздин балаңыздын денеси ысып, жөтөлүп, тамагы ооруп жатса жана анын денесинде кызыл бүдүрлөр пайда болсо, токтоосуз дарыгерди чакырыңыз. Бардык санитардык-гигиеналык нормаларды сактаңыз",- деп айтылат маалыматта.

Эске салсак, аталган оору аба аркылуу жугат.

Автор: Мальвина Уметбекова