ШИШКЕБЕК ДАЯРДАЙБЫЗ!

Азыр табигат коюнунда эс алуу үчүн мыкты убак. Андайда шишке эт сайып, отко кактап бышырып жесең... Шишкебек канчалык даамдуу болору туура маринаддоодон көз каранды. Шишкебектин этин маринаддоонун сырлары менен ашпозчу ШЕРЗОД ВАЛИЕВ бөлүшмөкчү.

МАРИНАДДОО
Маринад – ачкыл сууга салып даярдалган татымал. Ал эттин ширесинин агып кетүүсүн токтотуп, аны күйүп калуудан сактайт. Ошондой эле маринаддалган эт жумшак, ширелүү болот жана шишкебек тез бышат.
Этти маринаддоо үчүн туз, пияз, калемпир, мурч, сарымсак, кинза, киви, атайын шишкебек үчүн даярдалган татымалдар керек. Ал эми суюктуктардан квас, айран, газдалган суу, анардын, алчанын, лимондун ширеси жана өсүмдүк майы керек. Мындан сырткары коньяк, сыра кошуп койсо да болот. Пияз шишкебек үчүн эч качан көп болбойт. Ал канчалык көп болсо шишкебегиңиз ошончолук ширелүү болот. Маринад этти толугу менен жаап турушу керек.


ТООК ЭТИНЕН ШИШКЕБЕК
Чуңкур идишке өсүмдүк майын, газдалган минералдык сууну, калемпир, мурч жана лимон ширесин аралаштырып алабыз. Анан таза жуулган тооктун сан этин салып, үстүнө пияз туурап аралаштырабыз. Тоок эти 2 сааттан 5 саатка чейин маринаддалып турса жетиштүү.

Керектелүүчү азыктар:
Тооктун сан эти 6 даана,пияз 0,5 килограмм, 2 даана лимондун ширеси, 5 аш кашык өсүмдүк майы, калемпир, мурч, туз, ашкөк (татымына жараша).

ЭТ ТАНДОО
Шишкебекке негизинен бардык эттер жарай берет, бирок жаш малдын этинен жасалса жумшак жана ширелүү болот. Малдын арткы сан эти, төш эти, кабыргалары жарайт. Ал эми тооктун сан этин гана алууга аракет кылыңыз. Этти шишке сайганга ылайыктуу өлчөмдө кесип даярдап алыңыз, бир кесими болжол менен 30 грамм салмакта болгону жакшы. Майда тууралып калса кургак болуп, ал эми чоң тууралса шишкебектин сырты күйүп, ичи бышпай калат.

УЙ ЭТИНЕН ШИШКЕБЕК
Шишкебекке жаш малдын эти тандалып алынат. Этти майдалап туурап, чуңкур идишке салабыз да, ага газдалган минералдык сууну куюп, туз, мурч, ачуу калемпир, зире, бир аз өсүмдүк майын, атайын шишкебекке арналган татымалдарды кошобуз. Эт катуу болсо, кивинин ширесин да кошуп коюу керек. Маринаддоо учурунда татымалдарды каалагандай кошо берсе да даамы бузулат. Ошол себептен биринин даамын бири ача турган татымалдарды кошуу зарыл. Кечинде маринаддап, эртең менен шишкебекти бышыра берсе болот.

Керектелүүчү азыктар:
1 килограмм эт, 0,5 килограмм пияз, шишкебекке арналган татымалдар (мурч, калемпир, туз, зире), бир даана киви.

КЕБАБ
Кебабга (мыкчыма шишкебек) эт тандоодо малдын жаш-карысына маани берилбейт. Себеби эт эт туурагычтан эки ирет өткөрүлөт. Ага малдын ич майын, нан, пиязды майдалап кошобуз.
Кебаб башка шишкебектерге окшоп суткалап маринаддалбайт. Татымына жараша туз, зире, ашкөк кошуп аралаштырабыз да, тыныктырбастан эле шишке мыкчып ороп коёбуз.

Керектелүүчү азыктар:
1 килограмм эт, 200 грамм нан, 250 грамм ич май, 3-4 баш пияз, татымына жараша зире, мурч, калемпир, шишкебекке арналган атайын татымалдар кошулат.

ЭСКЕ ТУТУП АЛЫҢЫЗ!

  • Этти сөзсүз түрдө айнек, сыр же чопо идиштерине маринаддоо керек. Алюминийден жасалган идиштер жарабайт, ал эт жана башка заттар менен кычкылданып, эттин даамын бузат, ууландырып коюшу да мүмкүн.
  • Маринаддалган эт муздаткычта турганы жакшы.
  • Эттин кесими канчалык чоң болсо, ошончолук көпкө маринаддоо абзел.
  • Маринад жакшы сиңиши үчүн вилка менен этти сайгылап коюу зарыл.
  • Балык же деңиз продуктуларын 45 мүнөттөн ашык маринаддабоо керек.
  • Шишкебекти бышырар алдында этке өсүмдүк майын сүйкөп койсоңуз, эттин ширеси чыгып кетпейт.
  • Эттин үстүнө оор нерсе бастырып койсо жакшы маринаддалат.
  • Этти маринаддоого уксус менен майонезди кошууга болбойт, себеби уксус эттин даамын бузуп, бышканда катуу кылып койсо, майонез этке сиңип, отко бышканда ден соолукка зыян алып келүүчү затка айланат.

Эт даяр болгондо аны шишке сайып, мангалга коё берсеңиз болот. Шишкебегиңиз даамдуу, эс алууңуздар көңүлдүү өтсүн!

Нурбек Абдыкадыров,
Уулбү Каныбекова
kenesh@super.kg

 Кыстарылган видео 
Шишкебек жасоонун сырлары
"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (12)
Lavanda
2014-05-19 10:42:06
Эң сонун кенештер!Табитти ачып жибердиңиздер....
+2
baku24
2014-05-19 14:12:54
мына сага жакшы кенеш мен куйом менен малдын этин бир тун коюш к.к д талашып аттым эле утуп кеттим
0
Ayima
2014-05-19 14:54:16
mmmmmmmmm achka bolup chiktim
0
Aziz91
2014-05-19 17:36:21
сооннун маринаддоону кайдан уйронсом экен деп журдум эле. Рахмат силерге
0
lolo
2014-05-19 18:51:55
Nyam nyaam nyaaaam sonuun eken. hm maionez menen uksus bolboit ekenda , jakwi kenesh eken !
0
madina.00
2014-05-20 00:54:01
Кебаб жагат, таш-кордонун кандай жасалышын да жазгылачы, себеби таш-кордо ушунчалык даамдуу,соогунон бери жеп жибергин келет.
0
admin_portal
2014-05-20 11:42:03
madina.00, Саламатсызбы!
Таш кордо тууралуу бул жактан көрө аласыз: http://www.super.kg/media/stv/81597/
0
kyrgyzajym
2014-05-23 20:58:11
Bul jaktan Arsen Bajkege choong yraazy4ylygymdy bildirgim keldi!Tak sujlop,ajabaj jakshy tushundurup berdiniz. Bar bolunuz! Azamatsyz! Ijgilik Sizge!
0
Jesu2010
2014-05-23 23:02:50
Шашлыыык, даамына береке!
0
listopad_toy_oseni
2014-05-24 09:46:51
Шишкебек жегим келип кетти.)))
0
Prince
2014-05-24 23:10:54
Шерзод кайсы кафенин ашпозчусу экенин дагы жазып койсон ор болмок
0
Gulnura-94
2014-06-05 18:03:55
жазгыга жакшы жанылык экен
0
№ 602, 16-май-22-май, 2014-ж
БАШКЫ БЕТ
СОҢКУ КАБАР
СУПЕР-ИНФО
SUPER.KG ВИДЕО
МЕДИА-ПОРТАЛ
Кинозал
ЖЫЛНААМА