Акыркы кезде "Биз" тобу чыгармачылыктан таптакыр алыстап кеткен. Ошондон улам аталган топту элге тааныткан 1-курамды чогултуу идеясын Бактыяр Токторов көтөрүп чыкты. Ошентип, Насирдин Жуманов, Ильяз Агыбай уулу, Алмаз Кудайбердиев кайрадан эл назарында. Бул тууралуу Бактыяр Токторов: “Элибиз компьютердик үн менен концерт бергендерден тажашты. Биз аз да болсо бул тажатмадан арылтып, жагымдуу маанай тартуулоону туура көрүп турабыз. Буюрса, бас-гитара, ритм-гитаранын, клавишанын жана урма аспаптардын коштоосунда жандуу үн менен концерт берүү үчүн даярдык көрүүдөбүз”,- дейт.

Учурунда СССРдин легендарлуу хоккейчилери болгон команда январь айынын аягында Бишкекке келишкен эле. Ошондо алар менен Кыргызстандын хоккейчилер курама командасынын ортосунда достук беттешүү өткөрүлгөн. Биздин команданын курамында ырчы Турдалы Аскарбеков да ойноду. Достук беттештин соңунда кыргызстандык хоккейчилер конокторго кыргыздын камчысын белекке беришсе, алар жооп кылып сувенир шайбаларды эстеликке калтырып кетишти.

Телеалпаруучулар Роза Ибраимова менен Шайырбек Арапов Улуттук биринчи каналдын “Браво” берүүсүнө чоң өзгөртүү киргизишти десек болот. Алпаруучулардын конокторго курч суроолорду берип, "Бравону" олуттуу көрсөтүү кылууга жасаган аракеттерин байкаган жетекчилик жумасына эки жолу эфирге чыгарууну чечишкен. Ал эми убактысын болсо кечки убакка жылдырышты. Баса, аталган программа өз ичине бир нече рубриканы да камтыганы жатат.

Кыргыз эстрадасынын көрүнүктүү ырчы жигиттери Султан Садыралиев менен Самат Дөөлөтбаков бир күндө төрөлүшкөн. Тагыраак айтканда, 3-февралда. Бул күндү алар өз-өзүнчө достору жана сахналаштары менен жакшы маанайда белгилешти. Султан мүчөл жашын белгилебей эле коёюн деген. Бирок ата-энеси, туугандары куттуктап келгенден кийин кечке жуук сахналаш достору кафеге сүйрөп кетишкен. Султан жакындарынан тышкары, күйөрмандарынан да түрдүү белектерди алды. Алардын эң өзгөчөсү Садыралиевдин кичинекей кезиндеги сүрөтүн колго тартып келген күйөрманынын белеги болду. Ал эми Самат болсо, банкта иштеген кесиптештери менен ырчы досторун бириктирип, караоке-барда туулган күнүн өткөрүп, түрдүү белектерге көмүлдү да калды.

Эрмек Нурбаев жетектеген “Тамашоу” долбоорунун 5-февралдагы оюнуна “Супер-Инфо” гезитинин командасы да катышмакчы. Ошондой эле адаттагыдан өзгөчөлөнүп, “Калыстар” жана “Ырчылар” командалары да ойношот. Аталган төрт команда таймашпайт, жөн гана конок катары өз өнөрлөрүн тартуулашат. Ал эми "Спортчулар" командасы белгисиз себептер менен катыша албай калышты.