Султан Садыралиев продюсер Динара Эсенгулова менен төрт жылга жакын үзүрлүү эмгектенгени жалпыга маалым. Ортодогу келишимдин мөөнөтүнүн бүтүшү менен экөө жылуу-жумшак кош айтышкан эле. Эми бул жигитти продюсер Рысбек Жабиров канатына калкалай баштады. “Султан экөөбүз расмий келишим түзбөй эле эркекче сүйлөштүк. Ага продюсерлик кылбайм. Кайсы күнү канча тойго барып ырдадың деп да суракка албайм. Бирок ар кандай кырдаалдарда колдоо көрсөтүп, концерттерин уюштурууга жардамдашып, чогуу иштешебиз” деп билдирди бул тууралуу продюсер. Адатта бул продюсер көмөк көрсөткөн балдарын жакшы кызга үйлөнтүп, анан өкүл ата болуп да алчу эле. Бул жолку Рысбек & Султан тандеминен эмне чыгар экен? Күтө туралы.

“Шала-ла-ла” деген ыр учурда радиолордон байма-бай жаңырууда. Ырды аткарган сүйкүмдүү Чолпонай эми ырына клип тарттырмакчы. Учурда клипте сүйүктүүсүнүн ролун аткара алчу жигитти издөөдө. Жигит шыңга бойлуу, жылдыздуу болушу керек. Чолпонайдын бактысына кайсы жигит туш болот, клиптен көрөбүз.

Жаңыдан тааныла баштаган жаш ырчы Марлен жакында эле кызык окуяга туш болду. Тагыраак айтканда, ырчы ыр жаздыруу үчүн кечки саат алтыда досторунун студиясына барган. Анан 2 досу телефон менен сүйлөшүп, алаксыган боюнча Марленди сыртынан бекитип кетип калышкан. “Ана келет, мына келет” деп күтүп отура берген ырчы ачка калып, үшүп, түнү бою камалып отуруп студиядан эртеси саат тогузда чыккан. Көрсө, ырчынын достору студиядан чыгышкан соң эле Кара-Балтага зуу коюшкан экен.

"Тумар" радиосу жыл сайын бир кызматкерине Европа өлкөлөрүнүн биринен билим алып келүүгө мүмкүнчүлүк түзүп бермекчи. Бул жылы Германия өлкөсүнө барып келүү Элиза Кененбаеванын бактысына буюрду. Ди-джей кыз "Немецкая волна"радиосунун мыкты адистеринен сабак алып, Европалык стандарт боюнча иштөөнү үйрөнүп келди. Германиядан алган билимин пайдаланып, Кыргызстанга кайтып келери менен өз күйөрмандарына “Шоу-сандык” аттуу жаңылыктар түрмөгүн эфирге алып чыкты.

Көз айнеги көзүнөн түшпөгөн Бекчоро продюсерсиз калды. Ырчы менен продюсер Семетей Мырзакановдун ортосунда түзүлгөн эки жылдык келишим соңуна чыкты. Мындан ары ким менен иштешесиң деген сурообузга “продюсер менен иштешүүнүн жаман жактарын көрө алган жокмун. Эгер жакшы продюсер чогуу иштешүүнү сунуштаса, ойлонуп көрөм. Семетейдин башка иштери көп, колу иштен бошобой, мени менен кошо гастролдоп жүрүүгө убактысы жок” деп жооп берди.

18 жаш... Жаштыктын эң ширин да, толуп да турган кези эмеспи! Муну айтканыбыздын себеби Бегимай Эсенгулова эртең 21-ноябрда 18 жашка толгонун белгилемекчи. Ырчы кыз туулган күнүн жакын туугандары, курбулары, чыгармачылыктагы достору менен борбордогу кафелердин биринде майрамдоону пландап жатат. Бегимайга биз дагы бекем ден соолук, чыгармачылык эргүү каалайбыз!

“Кыргызстан Обондору” радиосунун ди-джейи Нурзада Жолдошованы эми күйөрмандары ЭлТР телеканалынан көрө алышат. Өзүн теле жаатында да сынап көргүсү келген ди-джей кызды 2-3 телеканал иштешүүгө чакырган эле. Нурзада алардын ичинен коомдук телеканалды тандап алган. Ошентип, ди-джей дүйшөмбү күнү маалымат-музыкалык саатын даярдап, аптасына бир жолу эфирге чыга баштады.

Таланттуу скрипкачы Нурайым Азыкбаеванын мукам музыкалары кимдин гана жүрөк кылдарын титиретпесин?! Бул бийкечке казак туугандар да ашык. Жакында эле Казакстанда өткөн корпоративдик кечелердин бирине барган Нурайымга Роза Рымбаева Казакстанга келип иштөө сунушун айткан. Нурайым буга чейин Розанын музыка жаатындагы мастер-классынан өткөн. Роза айымдын сунушуна Нурайым азырынча “ооба” же “жок” деп жооп бере элек.