ЫРЧЫЛАР МЕНЕН КЛИПМЕЙКЕРЛЕРДЕ ИДЕЯ ТҮГӨНДҮБҮ?
Заманбап фотоаппараттын чыгышы кыргыз ырчыларына чоң табылга болду. Ошондуктан азыр клиптер байма-бай тартылып, сапаты да жакшырууда. Бирок биздин өлкөдө жакшы, кызыктуу жерлер азбы же клипмейкерлер менен ырчылар изденгиси келбейби, айтор, акыркы кезде окшош декорацияда, окшош фондо тартылган клиптер көбөйдү. Алардын айрымдарын санай кетели.
АК, САРЫ, ЖАШЫЛ, КӨК, КЛИПТЕРДЕ ТҮТҮН КӨП...
Түстүү түтүндөр, кара фондогу тоголок сары жарыктар азыр ар бир клипти каптап бараткандай таасир калтырат. Алсак, ар кандай түстөгү түтүндөр Нурлан Насиптин "Достор", Бураштын "Мысли о тебе", жаш ырчы Мыктыбек Нурланбековдун "Аруузат" аттуу клиптеринде абаны ыштайт. Ал эми кара фондогу сары түстөгү жарыктар Анжеликанын "Жүрөгүмдөн", Мирбек Атабековдун "Энекем", Адилет Азимовдун "Сүйүү күчү" сыяктуу клиптерине көрк берген.
ТОПУРАК "ТРЕНДИ"
Топурак карьерине Нурмат Садыров алгачкылардан болуп клип тарткан. Андан бери бир нече жылдыздар ал жакка барып клип тарттырып, чаң жутуп келишти.
Кийинки кездерде клипмейкерлер арасында топурак "тренди" башталды. Топурак казылып алынчу карьер, кооз кийинген ырчы, артында кызыл топурактуу жар... Мындай кадрларды сиз деле көп клиптен байкасаңыз керек. Алардын айрымдарын санай кетсек: Чолпонай жана Аско "Чыгыш жомогу", Бурул Арунова "Бактым менин", "Чоро" тобу жана Айбек Бакытбеков "Балалыкты эңсөө", Нурмат Садыров "Сага байланам", Айя Садырова менен Хасан Хамдиев "Моё сердце" аттуу клиптеринде топурактуу жардын жанында ырдашат.
ПАВИЛЬОНГО АЙЛАНГАН ОКУУ ЖАЙЛАР
Омар менен Дайыр Исмадияровдун клиптеринде айрым эпизоддор коёндой окшош. Эки клипте тең топ кыздардын коридордо басып келе жатканын, жигиттердин спорт залда баскетбол ойноп жатканын көрүүгө болот.
Акыркы күндөрү клиптердин көпчүлүгүндө Бишкек шаарындагы 2 окуу жайдын имараттарынын ичи, спорт залы жана тепкичи "жылдыз" болуп жатат. Тагыраак айтканда, Борбордук Азиядагы Америка университети жана Кыргыз-Түрк "Манас" университети клипмейкерлердин павильонуна айланды. Алсак, БААУда Омардын "Сен", Дайыр Исмадияровдун "Аста-аста" жана башка бир топ ырчылардын клиптери тартылган. Ал эми Кыргыз-Түрк "Манас" университетин Дайыр Исмадияровдун "Досторум", "Сен сүйсөң болбойбу?", Нурлан Насиптин "Карындаш", Нурмат Садыров жана Баястандын "Табышмак сулуу" жана башка жаш ырчылардын клиптеринен көрө аласыз.
КЫРГЫЗ КАНЬОНУ КЛИПТЕРДИН КӨРКҮН АЧУУДА
Соңку жылдары ырчылардын клиптери кыргыз каньонунда көп тартылып, баары жомоктогудай болуп кетти. Башкача айтканда, Ысык-Көл облусунун Тоң районуна караштуу Кажы-Сай айылында Жомок деп аталган сай бар. Ал сайда кадимки каньондорго окшогон кырка аскалар айлананы көрккө бөлөп, туристтерди өзүнө тартат. Мындан тышкары клиптерге өзгөчө кооздук тартуулайт. Мисалы, Айар "Көл үстүндө", Гүлбү Ороскул кызы "Ортомчу бизге Ысык-Көл", Айжамал Кабылова "Биймерген", Гүлжигит Сатыбеков "Сагынам" сыяктуу клиптерин так ошол жерден тартышкан. Бул аскаларды башка да бир топ ырчылардын клиптеринен байкоого болот.
ИНСТАГРАМ ЭМЕС, КИТЕПКАНАНЫ ТАНДАГАН ЫРЧЫЛАР
Гүлжигит Сатыбековдун клибиндеги кыз колундагы мамалагын унутуп кеткен окшобойбу... Анткени ал мамалакты Гүлсүн Бостонкулованын да клибинен байкоого болот.
Кыргыз ырчылары чынында Инстаграмда көп отурушкандары менен, клиптеринде китепканада көп отурушат. Же чындап эле интернеттен тажашып, китеп окууга өтө дилгирленип башташканбы? Дегеним, соңку клиптерде китепкана же китепканага окшош декорация жасалган студиянын ичинен тартылган клиптер көп. Алсак, Гүлжигит Сатыбековдун "А балким", Гүлсүн Бостонкулованын "Сенин махабатың", Асел Касымованын "Жалгызым", Анжеликанын "Балалыгым", Омардын "Бирге бололу", Даниелдин "Когда я стану ближе" сыяктуу клиптеринен китептерди көрө аласыз.
Асхат Субанбеков
star@super.kg
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (36)
Жакшы жакшы аракет кыла беришсин
Клипттери тег эле окшошбойт кебир ырчылардын
Азаматсынар супер инфо. Ушул окшош клиптер жонундо коптон бери ойлоп жургом. Оригиналдуу клип кутобуз, ырчылаар....
Дагы он жылдан кийинки ырлар моондой:дөңгө чыктым дөңдөн түштүм. Бир байпак бүтүн бири жыртык
Суперчилер Айпери Кубик кызы жонундо жазыныздарчы.Ажырашып кеткени чынбы жалганбы?
Jesika, саламатсызбы? Сунушуңузга рахмат, тиешелүү бөлүмгө жеткирилди.
Клип мейкерлерге идеяны ырчылар айтса болот. Негизи ырчы чечет кандай тартуу керек экенин. Экоондо да жаны идеялар болуусу керек. Мага Айпери Кубик кызынын клиптери жагат. Ал чындап жаны идеялардын устундо иштейт. Айперинин эчкимиси болбойм, даже фаны да эмесмин, просто жаны идеяларды изденуусу жагат
Омар жанагы жаны чыккан суйомун сенидеген клибин Алексей Воробьевдун Сумасшедшая деген клибин туураган турбайбы.
комментттер укмушго.. жакшы сортировка кылып коюшуптур окшоштор деп.. дагы бир идеасы бар мейманканада тарткан.. бала менен кыз жашап калат анан эле урушуп кетет себепсиз.. Омардын клиби чын эле орустардын клибине окшоп калыптыр.. бирок ошол орустардын клиби более сонун чыккан..
дагы бир идеа калып калыптыр "мейманкана " бапры эле кыз жигитти жашатып коет
Албетте,клиптин баарын бир клипмейкер тартып жатса окшош болот да:)
Баарыле тойдо журсо изденуунун кереги барбы женил акча .
Бирин бири дуурап жатышат
Нурлан киного тартылбай эле жонеле ырдай берчи сураныч,актердук чеберчилик нөл
