Америка Кубогунун финалында Чили курамасы Месси баштаган аргентиналык футболчуларды утуп алды

5-июлга караган түнү Чилиде футбол боюнча Америка Кубогу жыйынтыкталды. Мелдештин финалында Аргентина курамасы менен Чили кез келип, үй ээлери жеңишке жетишти. Муну менен Чили курамасы аталган мелдешти алгачкы жолу ута алды.

Мелдештин расмий сайты кабарлагандай, беттештин негизги убактысы жана кошумча 15 мүнөттүктөр да 0:0 эсебиндеги тең чыгуу менен аяктады. Ал эми пенальтилер сериясында чилиликтер жолдуу чыгып, 4:1 эсебинде жеңишти камсыздашты. 11 метрлик соккуларды Чилинин курамынан Фернандес, Артуро Видаль, Чарлес Арангис жана Алексис Санчес сыяктуу футболчулар так аткарышты. Ал эми Аргентинанын футболчулары 3 сокку узатып, команда лидери Лионель Месси гана гол жаратты. Гонсало Игуаин топту дарбазадан ашыра тепсе, Эвер Банеганын соккусун дарбазачы Клаудио Браво тосуп алды. 1993-жылдан тарта аталган мелдешти ута элек Аргентина курамасы ошентип бул жолу да кубоктон куру калды.

Кошумчалай кетсек, мелдештин башкы бомбардирлери Паоло Герреро (Перу) менен Эдуардо Варгас (Чили) болду. Эки футболчу тең 4 гол киргизди.

Буга чейин 3-орун үчүн болгон оюнда Перу курамасы Парагвайды 2:0 эсебинде утуп алган.