Малайзиянын дагы бир университети кыргыз жаштарына акысыз окуу үчүн 5 орун бөлдү

Кыргыз өлкөсүнүн Малайзиядагы элчилиги Лимкоквинг креативдүү технологиялар эл аралык университети Кыргыз Республикасынын студенттерине акысыз окуу үчүн 5 орун бөлгөнүн кабарлады. Мындай демилге 2015-жылдын 17-ноябрында элчи Кылычбек Султанов менен аталган университеттин ректору Тансри Д-р Лим Кок Вингдин Сайберджая шаарындагы жолугушуусунда колдоо тапкан. Жолугушууда университеттен кыргыз жаштарына стипендия бөлүү, Кыргыз Республикасына университеттин филиалын ачуу мүмкүнчүлүктөрү талкууланган эле.

Маалымат үчүн: Лимкоквинг креативдүү технологиялар эл аралык университети 1991-жылы негизделип, Малайзиянын "Силикон өрөөнүндө", Сайберджая шаарында жайгашкан. Университет 6 факультет аркылуу кеңири багытта билим берет: инновациялык дизайн, мультимедиа жана чыгармачылык, коммуникация, медиа жана чагылдыруу, маалыматтык жана компьютердик технологиялар, бизнес менеджменти, архитектура жана курулуш.

Окуу жай өзүнүн тарыхында үч континентте: Англия, Ботсвана, Индонезия, Малайзия, Лесото, Камбоджа, Свазиленд падышалыгы, Кытай сыяктуу өлкөлөрдө кампустарын ачкан. Малайзиялык филиалында дүйнөнүн 130 өлкөсүнүн студенттери билим алышат.

Элчилик Малайзиянын башка университеттери менен да кызматташтык түзүү боюнча тийиштүү иштерди жүргүзүүдө. Башкы максат - кыргыз студенттерине малайзиялык ЖОЖдордон орун бөлдүрүү. Сүйлөшүүлөрдүн жыйынтыгы боюнча кошумча маалымат берилет.

Эскерте кетсек, жакында Малайзиянын "Kolej Mentari" университети өлкөбүздүн 10 жаранын акысыз окутууга орун бөлгөн.

Автор: Автандил Добулбеков