Президент сынга алган Убактылуу өкмөттүн курамында кимдер болгон?

Президент Алмазбек Атамбаев "Ала-Тоо" аянтында эгемендүүлүктүн 25 жылдыгына арналган салтанатта сүйлөгөн сөзүндө 2010-жылдагы төңкөрүштөн кийин жарым жыл убакытка түзүлгөн Убактылуу өкмөттүн мүчөлөрүн сынга алып, убагы келгенде ар бири жооп бере турганын белгиледи. Президент өз сөзүндө: "Убактылуу өкмөттүн кээ бир мүчөлөрү эртеби-кечпи, тоноочулук үчүн, банктык уячалар үчүн дагы, Кадыржан Батыровду баш кылып сепаратисттерге болушкандыгы үчүн, аны качыргандыгы үчүн жана мыйзамсыз баюу максатында кызматтык абалдарынан пайдалангандыгы үчүн жооп беришет", - деген. Учурда ошол кездеги Убактылуу өкмөттүн мүчөлөрү Бишкекте жыйынга чогулуп, президенттин сөзүн талдап жатышат.

Эскерте кетсек, Убактылуу өкмөттүн курамында төмөнкүлөр болгон:

Убактылуу өкмөттүн төрайымы – Роза Отунбаева;
Каржы боюнча орун басары – Темир Сариев;
Экономика боюнча орун басары – Алмазбек Атамбаев;
Конституциялык реформа боюнча орун басары – Өмүрбек Текебаев;
Прокуратура жана каржы полициясы органдары боюнча орун басары – Азимбек Бекназаров;
Ички иштер министри – Болотбек Шерниязов;
Улуттук коопсуздук кызматынын төрагасы – Кеңешбек Дүйшөбаев;
Саламаттыкты сактоо министри – Дамира Ниязалиева;
Убактылуу өкмөттүн аппарат жетекчиси – Эмилбек Каптагаев;
Өзгөчө кырдаалдар боюнча министрдин милдетин аткаруучу – Дүйшөнкул Чотонов;
Коргоо министринин милдетин аткаруучу – Исмаил Исаков;
Каржы полициясынын төрагасы – Эркин Бөлөкбаев;
Бишкек шаарынын мэри – Иса Өмүркулов;
Айлана-чөйрөнү коргоо жана токой чарбасы боюнча мамлекеттик агенттиктин директору – Топчубек Тургуналиев;
Коомчулук жана ММК менен байланыш, социалдык секторунун координатору – Элмира Ибраимова.