Бишкектеги Мукай Элебаев жана Максим Горький көчөлөрүнүн кесилишиндеги кафеде кечээ, 2-февралда таңга маал кызча кийинген 3 бала жаңжал чыгарып, журналисттин камерасын талкалаган. Бул тууралуу бүгүн, 3-февралда SUPER.KG порталына кафенин кызматкерлеринин бири билдирди.
Маалыматка ылайык, алар кафеге акчаны толугу менен төлөй албай жаңжал чыгарышкан. Чакырыкка келген укук коргоо кызматкерлери менен бирге журналист Азият Жекшеев да барган. Кызча кийинген балдар аларга каршылык көрсөтүп, журналисттин камерасын талкалаганга жетишишкен.
Бишкек ШИИББинин басма сөз катчысы Олжобай Казабаев бул 3 жаранга карата Кыргыз Республикасынын Кылмыш-жаза кодексинин 234-беренеси (бейбаштык) боюнча кылмыш иши козголгонун билдирди.
"Тергөө иштерин Октябрь райондук ички иштер башкармалыгынын тергөөчүлөрү жүргүзүп жатышат. Келтирилген чыгым эсептелип бүтө элек", - деди Олжобай Казабаев.