Чек, Кыргызстан, Кормоцех айылдарынын суу каптоо коркунучу бар аймактарында жашаган кожолуктар көчүрүлүүдө

Жалал-Абад облусу, Ноокен району боюнча 18-19-апрель күндөрү жааган жаан-чачындан улам Арал айыл аймагынын Кара-Үңкүр дарыясындагы суунун нугу көтөрүлүп Арал айылындагы коргоочу тосмонун 250 метр аралыгын жууп, Мазар участкасындагы 234 турак жайга жана 2138 гектар айдоо жерлерге кооптуу абал жаралган. Бул тууралуу Өзгөчө кырдаалдар министрлиги бүгүн, 19-апрелде кабарлады.

"Аталган дамбаны бекемдөөгө “Би-Калина” ишканасынан 3 инженердик техника, менчик техникалардан 2 кран, 4 трактор, 1 экскаватор, 1 автожүктөгүч, 6 даана камаз тартылган. 150 жергиликтүү тургундар, 19 куткаруучу тартылып, 600 кап коюлган 15 рейс таш ташып, 20 дарактар кыркылган. Саат 13:00дө Чек, Кыргызстан, Кормоцех айылдарынын суу каптоо коркунучу бар аймактарында жашаган кожолуктарды көчүрүү иштери башталды", - деп жазылат маалыматта.

Эскерте кетсек, окурмандар "Элдик кабарга" Сакалды, Арал жана Черёмушки айылдарын сел каптаганын кабарлашкан.

Автор: Үмүт Абдраимова