Якутиядагы суу каптаган шахтадан Алишер Мирзаев аттуу жумушчу табылды, дагы 8 кенчи изделүүдө

Якутиянын Мирный шаарындагы суу каптаган шахтадан изделип жаткан 9 жумушчунун бири табылды. Бул тууралуу чет элдик маалымат булактары жазууда.

Ага ылайык, кечээтен бери изделип жаткандардын арасынан бүгүн, 5-августта Алишер Мирзаев аттуу кенчи табылып, куткарылган.

"36 жаштагы Алишер Мирзаев 2009-жылдан бери кен казуучу шахтада иштеп келет. Ал шахтанын 410-метринде калган. Куткаруучулар аны чыгаргандан кийин медициналык биринчи жардам көрсөтүлүп, ооруканага жаткырылды. Мирзаев катуу үшүп калган, абалы азыр оор. Бирок өмүрүнө коркунуч келтирген жаракаттар жок", - деп жазылат маалыматта.

Кечээ, 4-августта Якутиядагы "Алроса" кен ишканасына тиешелүү шахтаны суу каптап кеткен. Кырсык болгон учурда анда 151 жумушчу болгон. Анын ичинен 142 жумушчу куткарылып, калган 9 кенчини издөө иштери улантылып жаткан.

Аталган компания изделип жаткандардын төртөө Белгород шаарынын, бешөө Мирный шаарынын жашоочулары экенин билдирген.