Токмок шаардык кеңешинин депутаты жаранды бычак менен сайганы боюнча Чүй ОИИББи жооп берди

Бүгүн, 28-августта Талантбек Жамангулов аттуу жаран "Токмок шаардык кеңешинин КСДПдан депутаты Тынай Жансейитов мага бычак сайды" деп SUPER.KG порталына кайрылган.

Чүй ОИИББинин басма сөз кызматы SUPER.KG'ге кабарлагандай, бул боюнча 26-август күнү РИИБдин нөөмөт бөлүмүнө жергиликтүү ооруканадан билдирүү түшкөн. "Анда бир эркек киши ооруканага бычактан алган жаракаты менен түшкөнү айтылган. 26-август күнү саат 7:30-8:00 чамасында Токмок шаарынын мал базарында 36 жаштагы жаран Чүй районунун тургунуна бычак менен жаракат келтиргени тууралуу белгилүү болгон. Жабырлануучу ооруканага жеткирилген. Бул факты боюнча биздин тергөө кызматы тарабынан Кылмыш жана Жаза кодексинин "адам өлтүрүүгө аракет жасоо" беренеси менен кылмыш иши козголгон. Азыркы тапта бул кылмыш иши боюнча соттук-медициналык экспертизалар дайындалган. Учурда жабырлануучу көрсөтмө бергенден жана арыз жазуудан баш тартууда. Жабырлануучунун айрым маалымат каражаттарына берген көрсөтмөлөрүнүн негизинде тергөө амалдары жүрүп жатат", - деп билдирди басма сөз кызматы.

Автор: Жылдыз Джускембаева