Кыргыз өлкөсүндө 600дөн ашык бала ВИЧ илдети менен жашайт

Кыргыз өлкөсүндө учурда 633 бала ВИЧ илдети менен жашайт. Мындай маалыматты SUPER.KG'ге 28-августта "Позитивдүү жаштар" коомдук фондусунун директору Айнура Усманова кабарлады. Анын айтымында, алардын эң жашы учурда 2,5 жашта болсо, улуулары 15-16 жашта. Усманова мындай илдетке кабылган балдардын 500дөйү Ош облусунун аймагында экенин белгилеп, алардын көпчүлүгүнө 2006-2007-жылдары ооруканада дарыгерлердин шалаакылыгынан жукканын айтты.

"Ошол учурдан кийин 200дөн ашык баланын ата-энеси балдарына ВИЧ илдети жукканын айтып чыккан. Айрым балдарга бул илдет ошол учурда жугуп калганы менен байкалбай жүрүп, кийин иммунитети төмөндөп кеткенде оорусу күчөп кеткен болушу мүмкүн. Бул илдетти жугуштуу деп айтууга да болбойт, бирок укол алуудан жана эмчек эмүүдөн жугат. Бала эненин курсагында жаткан учурда эч нерсе жукпайт, бала саламат төрөлөт. Эгерде ата-эне өзү ушундай статус менен жашаган болсо, саламат төрөлгөн балага эмчек эмизбеши керек", - деди Усманова.

Усманова жетектеген фонд тарабынан учурда ал балдарга атайын окуулар өткөрүлүп турат. Анда балдар өздөрүнүн статусу боюнча коомчулукка ачык айтып чыгууга жана лидерлик сапатка ээ болуусуна психикалык жактан тарбияланат.

"Акыркы 5 жылдан бери ал балдарга атайын лагер уюштурулуп, ата-энелери менен бирге келип окуулардан өтүшөт. Ал эми биз ата-энелерге балдарга кандай мамиле кылуу, кандай дары каражаттарын ичирүү керектигин, балдарды өзүнүн статусу боюнча коомчулукка эркин айтып чыгууга тарбиялап, үч жылдан бери иштешип келе жатабыз. Балдар Кыргыз өлкөсүнүн аймагында ачык айтышпаса дагы, Өзбекстан, Казакстанга окууларга барган учурда ачык айтып чыгып жатышат", - деп айтты Усманова.

Учурда 7 миңдей адам аталган илдет менен жашаган болсо, анын көпчүлүгүн эркектер түзөт.

Автор: Жамалидин Парманкулов
Фото: Алексей Осипов