Орусияда көп кабаттуу үйдө газ түтүгү жарылып, 79 адам дайынсыз болууда

Орусиянын Магнитогорск шаарында көп кабаттуу үйдө газ түтүгү жарылып, 79 адам дайынсыз болууда. Бул тууралуу бүгүн, 31-декабрда орусиялык маалымат каражаттары жазып чыкты.

Маалыматка ылайык, кырсык бүгүн саат 06:00 чамасында Карл Маркс кең көчөсүндө жайгашкан 9 кабаттуу үйдө орун алган. Аталган үйдө 111 адам жашап келген. Куткаруучулар тарабынан 19 адам эвакуацияланган. Урандылардын алдынан 3 адам куткаруучулар тарабынан куткарылган. Учурда кырсык катталган жерде издөө-куткаруу иштери улантылып жатат.

"Бул убакытка чейин 3 адамдын жансыз денеси табылды. 79 адам дайынсыз бойдон калууда. Алар урандылардын алдында болушу мүмкүн. Балким, туугандарыныкына конокко кетишкен. Мүмкүн башка жакта эс алып жүрүшөт. Азырынча көп нерсе белгисиз бойдон калууда", - деп билдирген жергиликтүү бийлик өкүлдөрү.

Автор: Мальвина Уметбекова