Кыргызстандын Бажы биримдигине кирүүдөгү жол картасы биримдиктеги өлкө өкүлдөрү тарабынан кабыл алынды

Кыргызстандын Бажы биримдигине кирүү алдындагы жол картасынын айрым бөлүктөрү соңуна чыкты. Ал кыргыз өкмөтү тарабынан жактырылып, Евразия кеңешинин коллегиясынан өттү. Бүгүн, 29-майда Евразиялык экономикалык кеңешменин отурумунда коллегиянын төрагасы Виктор Христенко "КРнын Бажы биримдигине кирүүсүндөгү жол картасы кароого даяр" деп билдирди.

"Жол картасы боюнча иш башталганына байланыштуу биз Кыргызстандын бардык экономикалык бирикмелер менен болгон интеграция маселелерин карап баштайбыз",- деди ал.

Орусиянын президенти Владимир Путин: "Биз азыр Кыргызстандын президенти менен КРнын Бажы биримдигине жана Евразиялык экономикалык биримдикке кирүү жаатында колдоо көрсөтүүгө макулдаштык. Кыргызстан менен Армениянын биримдикке кирүү боюнча чечими олуттуу болуп саналат. Биз буларга колдоо көрсөтүп беребиз",- деди.

Казакстандын мамлекет башчысы Нурсултан Назарбаев 1-июлга чейин КРнын Бажы биримдигине кирүү маселеси чечилиши керектигин белгилеп: "Кыргызстан боюнча тараптар бир чечимге келип, жол картасын кабыл алды",- деп билдирди.

Автор: Айпери Ганыжан кызы