Борбордо Мамлекеттик туу күнүнө карата флешмоб өтүүдө

Бишкектеги жаштар Дайыр Асанов атындагы сейил багында бүгүн, 3-мартта Мамлекеттик туу күнүнө карата флешмоб өткөрүшүүдө. Иш-чарага 50дөн ашуун жаштар катышып жатышат. Ак калпак кийип, туу көтөргөн жаштар оюн-зоок программаларын тартуулашат. Уюштуруучулар флешмобго 2 миңден ашуун адам чакырылганын билдиришкен эле.

Кыргыз Республикасынын Мамлекеттик туусу Жогорку Кеңеш тарабынан 1992-жылы 3-мартта бекитилген. Желектин бир түстүү кызыл болгону - эрдиктин жана тайманбастыктын символу, жаркыраган алтын күн бейпилдикти жана байлыкты чагылдырат, ал эми түндүк - үй кутунун символу, аалам катары дүйнөнү алда канча кеңири түшүнүүдө бир айлампага бириктирилген кырк нур байыркы кырк уруунун бирдиктүү Кыргыз Республикасы болуп бириккендигин айгинелейт. Түндүк - өлкөдө жашап жаткан элдердин биримдигинин символу, желектин кырмызы түсү айкөл Манастын туусунун түсү болгон.

Туунун авторлору: Эдил Айдарбеков, Бекбосун Жайчыбеков, Сабыр Иптаров, Жусуп Матаев жана Маматбек Сыдыков.

Автор: Айпери Ганыжан кызы
Фото: Жамалидин Парманкулов